Isa 62 | ZomZIV | STEP | Zion’ thumaanna phalvak bangin tang a, Jerusalem’ hotkhiatna meisel kuang a bat matengin, Zion ka khualna-in ka dai kei dinga, Jerusalem ka khualna-in ka dai om kei ding hi.

Isaiah 62

Zion’ Minthak

1 Zion’ thumaanna phalvak bangin tang a, ^a
Jerusalem’ hotkhiatna meisel kuang a bat matengin, ^b
Zion ka khualna-in ka dai kei dinga, ^c
Jerusalem ka khualna-in ka dai om kei ding hi.
2 Minamte in na thumaanna mu ding uh a, ^d
kumpi khempeuh in na minthanna a mu ding uh hi.
TOPA kam in nang hong phuah ding
minthakin nang hong kisam ding hi. ^e
3 TOPA khut sungah nang, thupina lukhu na hi dinga ^f
na Pasian khut sungah kumpi kilawmna lukhu na hi ding hi.
4 Amaute in nang, Nusiatsa hong ci nawn loin, ^g
na min Gamkhing a ci nawn kei ding uh hi.
Ahi hangin, nang tungah TOPA lungkim a, ^h
na leitang inlah pasal nei ta ding ahi manin ⁱ
nang Hephzibah ^{▼▼62.4 Hepzibah pen tuanu ka lungkimna cihna} hong kici in,
na leitang Beulah ^{▼▼62.4 Beulah pen zi neisa cihna} kici ding hi.
5 Tangvalno khat in nungakno khat a tenpih bangin,
na tapate ^{▼▼62.5 Ahikeh a lampa} in nang hong tenpih ding uh a,
zineipa a mo tungah a kipah bangin
nang tungah na Pasian a kipak ding hi. ^m
6 Jerusalem aw, na kulhte tungah galvilte ka koih khin a,
amaute sun le zanin a gamdai ngei kei ding hi.
TOPA a sam note,
mawkkhawl tawm kei unla,
7 Jerusalem a kipsak mateng le
tuanu leitung phatna a suahsak matengin amah khawlsak kei un. ⁿ
8 A khut taklam le a khut thahatna-in
TOPA kiciam khin a:
“Na antangte uh na galte uh an dingin
ka pia kik ngei nawn kei dinga,
note sepsa zu thak gamdang mite in
a dawn kik ngei nawn kei ding uh hi;
9 ahi hangin an late in ne-in ^o
TOPA phat ding uh a, ^p
lenggah kaikhawmte in
ka mun siangtho huang sungah a dawn ding uh hi,” a ci hi. ^q
10 Pusuak un, kongpite ah pusuakkhia un! ^r
Mite pai nading lampi sial un.
Zik un, lam lianpi zik un! ^s
Suangte khukkhia un!
Minamte adingin dialkhai khaito un.
11 TOPA in leimongte dongin
tangko khin a:
“Zion Tanu tungah gen un,
‘En in, na Honpa hong pai ta!
En in, a pahtakman hong kenga,
a ditkikna hong tonpih hi,’ ci un,” a ci hi.
12 Amaute, Mi Siangtho, ^t
TOPA Tatsate kici dinga,
nang, Zonkhiat, nusiat ngei nawn loh Khuapi,
hong kici ding hi.